Ош шаарынын тургунуна абакта отурган баласын чыгарууну убадалашып, белгисиз аялдар ал кызматы үчүн акча талап кылып жаткандыгы тууралуу маалымат Ош ШИИБге түшкөн.
Баласы абакта отурган жарандын милицияга берген маалыматына караганда, белгисиз аялдар ал кызматы үчүн 40 миң сом жана 6 миң доллар акча талап кылышкан. Акча талап кылгандар тергөө кызматы, соттор менен жакын мамиледе экендиктерин, 40 миң сомду өздөрү, ал эми 6 миң сомду сот тармагында иштеген “таасирдүү” адамга бере тургандыгын айтышып, акча табууну тездетип берүүнү талап кыла баштаган. Баласын чыгарып албаса, узак мөөнөткө камалып кете тургандыктарын айтып коркутушкан. Кийинчерээк 6 миңден 4 миң долларга түшүрүшкөн.
Бул маалымат Ош ШИИБге катталып, жабырлануучудан арыз алынган. Шектүү 2003-жылы туулган Жалал-Абад облусунун Сузак районунун тургуну жана Ош облусунун Өзгөн районунун 2004-жылы туулган тургуну экендиги, алардын тергөө же сот органдарында таптакыр иштебегендиги аныкталган. Алар жабырлануучунун уулу абакта отургандыгынан, оор психологиялык абалда экендигинен пайдаланышып акча алдап алууну көздөп жаткандыгы аныкталган.
Алар акча алып жаткан жерде «таасирдүү» адамына чалышып, 4 миң долларды азыр алып бара жатышканын айтышкан. Кафесинин алдында 4 миң доллар акчаны алган учурда жаран жана кыздар кармалган.
Ал эми таасирдүү адамы Кара-Суу районунун 1984-жылы туулган тургуну, ушул жылдын 1-февралынан тартып Кара-Суу райондук ички иштер бөлүмү тарабынан шектүү катары издөөдө жүргөн жаран экендиги аныкталган.
