ИИМдин кызматкерлери тарабынан баңгизат сатууга шектелген коңшу өлкөнүн жараны кармалды. Бул тууралуу ИИМден билдиришти.
ИИМдин Баңгизаттарды мыйзамсыз жүгүртүүгө каршы күрөшүү кызматынын Баткен облусу боюнча башкармалыгы тарабынан Жазык кодексинин 267-беренесинде (баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) көрсөтүлгөн кылмыштын белгилери боюнча катталган сотко чейинки өндүрүштүн жүрүшүндө баңгизаттарды саткан чет элдик жаран кармалды. Иликтөө иш-чараларын жүргүзүү учурунда Жаштык айылында Тажикстан менен чектешкен башкы жолдо баңгизаттарды жеткирүүнү уюштуруп жана сатууну көздөгөн Тажик жараны кармалган. Ага тинтүү жүргүзүү учурунда скотч менен таңгакталган 9 килограмм салмактагы өзгөчө жыты бар “гашиш” баңгизаты табылып алынган.
Соттук-химиялык экспертизанын корутундусуна ылайык, алынган зат Ооганда өндүрүлгөн “гашиш” (чарс) баңгизаты болуп чыгып, анын жалпы салмагы 9 килограмм 521 граммды түздү. Азыркы учурда кармалган жаран Лейлек райондук ички иштер башкармалыгынын убактылуу кармоочу жайына киргизилди.
