Баткен районунун Төрт-Гүл айыл аймагынын Чоң-Талаа айылындагы мыйзамдарды бузуу менен жеке менчикке өтүп кетип, учурда иштеп жаткан «Арак-Коньяк Заводун» мамлекеттин балансына кайтарылды. Бул тууралуу УКМКдан билдиришти.
«1997-жылы аталган айыл аймагынын тургундарынын элдик жыйынынын протоколдук чечими менен «Төрт-Гүл» ЖЧКсы түзүлүп, арак-шарап чыгаруучу ишкана жеке менчикке өткөрүлгөн. Андан ары 2006-жылы Төрт-Гүл айыл аймагынын №07/30 токтомуна ылайык, «Арак-Шарап Заводунун» жалпы аянты 2,89 га болгон аймагы, чет элдик катыштуулугу бар жеке фирмага бир кыйла арзан баага сатылып кеткен.
УКМК тарабынан тергөөгө чейинки текшерүү иштерин жүргүзүүнүн натыйжасында, аталган «Арак-Шарап Заводунун» уюштуруучулары жана директору ыктыярдуу негизде заводдун мүлкүн жана жер тилкесин толугу менен Мамлекеттик мүлктү башкаруу боюнча мамлекеттик агенттиктин балансына өткөрүп беришти», — деп айтылат маалыматта.
