Бишкек шаардык сотунун судьясы жана анын жубайы УКМК тарабынан кармалды. Бул тууралуу УКМКдан билдиришти. УКМК тарабынан коррупциялык көрүнүштөрдү жоюу боюнча жүргүзүлүп жаткан иштердин жүрүшүндө Бишкек шаардык сотунун жазык коллегиясынын судьясы жана судьянын аялы тарабынан алдамчылык фактысы аныкталды. "Тактап айтканда, Кыргыз жаранынан 2000 доллар (174 000 сом) өлчөмүндө акча талап кылган. Мындан улам аталган жаран “МБанк” тиркемеси аркылуу судьянын жубайынын атына акча которгон. Ал жолдошу болгон Бишкек шаардык сотунун жазык коллегиясынын судьясын Бишкек шаардык сотунун жарандык иштер боюнча коллегиясынын судьясы менен байланышууну суранып, жарандын пайдасына чечим чыгаруу өтүнүчү менен кайрылган", - деп айтылат маалыматта. Билдирүүгө ылайык, 16-декабрда судья Бишкек шаардык сотунун жарандык иштер боюнча коллегиясынын судьясынын иш бөлмөсүнө кирип, доогер жаранга жардам берүү өтүнүчү менен кайрылган. Ал эми судья-баяндамачы мындан баш тартып, мыйзамдарга ылайык чечим кабыл алына тургандыгын белгилеген. Ошол эле учурда, судья-баяндамачы аталган жарандык ишти кароону токтоткон, бул доогердин пайдасына болгон эмес. Жүргүзүлгөн тергөө-ыкчам иш-чаралардын жыйынтыгы боюнча, судьянын жубайы УКМКнын убактылуу кармоочу жайына киргизилди. Ал эми Бишкек шаардык сотунун судьясына карата чогултулган материалдар Судьялар кеңешине караштуу Тартип комиссиясына жөнөтүлүп, алар 18-декабрда кылмыш жоопкерчилигине тартууга макулдук беришти.