18-октябрда саат 21:30 чамасында Бишкек шаарындагы Бөкөнбаев жана Абдрахманов көчөлөрүнүн кесилишинде жол кырсыгы катталды.
«Lexus RX 330» маркасындагы авто унаанын айдоочусу, 1979-жылы туулган И.Д. аттуу жаран Абдрахманов көчөсү менен түндүктү көздөй багыт алып, Бөкөнбаев көчөсү көздөй бурулуп жаткан. Бул учурда Абдрахманов көчөсү менен түштүк тарапты көздөй бара жаткан 2008-жылы туулган А.А. аттуу жашы жете элек жаран башкарып бара жаткан «Toyota Camry» үлгүсүндөгү унаа аталган кесилиште «Lexus RX 330» унаасы менен кагылышкан. Кагылышуунун натыйжасында «Toyota Camry» унаасы тротуарга чыгып, төрт жөө жүргүнчүнү сүзүп кеткен. Кырсыктын кесепетинен жөө жүргүнчүлөрдүн бири, 2012-жылы туулган А.Т. окуя болгон жерде каза болгон.
Бул факты Бишкек шаарынын ички иштер башкы башкармалыгында катталган. Кылмыш-жаза кодексинин 312-беренесинин 3-бөлүгү (автоунаа каражаттарынын кыймылынын жана аларды пайдалануунун коопсуздук эрежелерин бузуу) боюнча кылмыш иши козголду. “Toyota Camry” үлгүсүндөгү унааны айдап бара жаткан 2008-жылы туулган А.А Бишкек шаарынын ички иштер башкы башкармалыгынын убактылуу кармоочу жайына киргизилген. Эки унаа тең камакка алынып, бардык зарыл болгон соттук-медициналык экспертизалар дайындалды. Учурда тергөө иштери уланууда.
«Бул кырсык жашы жете элек баланын айынан болгон, ал ата-энесинин билими жок жана айдоочулук күбөлүгү жок унааны алып, шаардын көчөлөрүнө чыгып кеткен. Бул кайгылуу окуя балдарды катуу көзөмөлдөө зарылдыгын дагы бир жолу эскертет. Сизден өтө кылдат болууну, жашы жете электерге транспорт каражаттарын башкарууну өткөрүп бербөөнү жана балдарыңыздын эмне кылып жатканын көзөмөлдөөнү суранабыз», — дешти милициядан.
