Бишкек шаарынын Свердлов РИИБдин милиция кызматкерлери тарабынан уюшкан кылмыштуу топтун активдүү мүчөсү катары Ички иштер министрлигинин ыкчам каттоосунда турган тоноого шектүү кармалды.
2023-жылдын 10-декабрь күнү милицияга К.К. аттуу жаран белгисиз адамдарга карата чара көрүү арызы менен кайрылган. Анда ошол эле күнү саат 04:00 чамасында Бишкек шаарынын Курманжан Датка жана Саратов көчөлөрдүн кесилишинде күч колдонуп, уюлдук телефонун тартып алганын, андан соң белгисиз тарапка качып кетишкенин айткан. Аталган факты боюнча Тергөө кызматы тарабынан Кылмыш-жаза кодексинин 206-беренесине (Тоноо) ылайык кылмыш иши козголгон.
Жүргүзүлгөн иликтөө жана ыкчам-издөө иш-чараларынын жүрүшүндө милиция кызматкерлери тарабынан уюшкан кылмыштуу топтун активдүү мүчөсү катары ИИМдин ыкчам каттоосунда турган, кылмышка шектүү 1987-жылы туулган К.А. аттуу жаран аныкталып кармалган. Свердлов РИИБдин Тергөө кызматына жеткирилип, убактылуу кармоочу жайга киргизилди. Тергөө иштери уланууда.
