Бишкектин Маевка муниципалдык аймактык башкармалыгында балдар бакчасынын имаратын мыйзамсыз менчиктештиргендер мамлекетке ыктыярдуу түрдө кайтарып берди. Учурда аталган имарат талкаланып, кароосуз калып, дары-дармек каражаттарын сактоочу жай катары колдонулуп келген. Бул тууралуу УКМКдан билдиришти
Маалыматка ылайык, 1994-жылы менчиктештирүү мезгилинде аталган бала бакча мыйзамсыз чыгарылып, кийин жеке менчикке сатылып кеткен. Мамлекетке кайтарылган имараттын пайдалуу аянты 735,8 чарчы метр болсо, турак жай аянты 460,5 чарчы метр жана 0,63 гектар жер тилкеси бар.
«Жүргүзүлгөн ыкчам-тергөө иш-чараларынын жүрүшүндө аталган объекттин ээси мүлккө ээлик кылуунун укукка жатпагандыгын түшүнүп, мурдагы бала бакчанын имаратын жер тилкеси менен кошо мамлекеттин пайдасына өткөрүп берди. Учурда мурдагы бала бакчанын имараты Бишкек шаарынын мэриясынын балансына максаттуу пайдалануу үчүн өткөрүлүп берилди», — деп жазылат маалыматта.
