Бишкекте артка жылып бараткан унаа баланы тебелеп кеткен видео тарады. Видеодон көп кабаттуу үйлөрдүн биринин короосунда эки бала ойноп жатканын көрүүгө болот. Бир убакта ак түстөгү унаа артка чыгам деп алардын бирин байкабай, тебелеп кеткен.
Бишкек ШИИБ маалымат берип, кырсык 10-май күнү саат 20:30 чамасында болгонун билдирди.
«2002-жылы туулган айдоочу Хюндай Солярис үлгүсүндөгү унааны артты көздөй айдап жатып, Чыңгыз Айтматов проспектисинде жайгашкан үйдүн короосунан 2016-жылы туулган баланы сүзүп алган. Кесепетинен бала ар кандай дене жаракаттары менен Шаардык клиникалык оорукананын реанимация бөлүмүнө жаткырылган. Бул факты Бишкек шаардык ички иштер башкы башкармалыгына катталып, териштирүү иштери жүрүп жатат. Унаа айып короого киргизилди», — деп айтылат маалыматта.
