18-май күнү саат 04:30 чамасында Аламүдүн айылындагы Курманжан-Датка көчөсүндө жайгашкан «А-С Т» ЖЧКнын тигүү цехине 60-70 белгисиз адамдар келишип, коомдук тартипти одоно бузуп, тигүү цехинин мүлкүн талкалап, ал жерде жашап иштеген Индиянын, Бангладештин жана Пакистандын жарандарын уруп-сабап денесине залал келтирип, акчаларын, уюлдук телефондорун жана башка мүлкүн ээлеп алып качып кетишкен. Бул тууралуу Ички иштер министрлигинен маалымдашты.
Аталган факты каттоого алынып, массалык баш аламандык беренеси боюнча кылмыштын белгилери менен кылмыш иши козголгон. Тергөө иштеринин жүрүшүндө, башаламандыктын натыйжасында «А-С Т» ЖЧКсынын тигүү цехине материалдык зыян келтирилип, 14 чет элдик жаран ар кандай дене жаракаттарды алып, алардын үчөөсү ооруканаларга жаткырылганы аныкталган.
