Буга чейин маалымдалгандай, УКМК мамлекеттик бюджеттен каржылануучу Бишкек шаарындагы жалпы билим берүү мектептеринин жана балдар чыгармачылык борборлорунун жетекчилеринен мыйзамсыз акча каражаттарын (пара) алуу боюнча Эсептөө палатасынын ишмердүүлүгүндөгү туруктуу коррупциялык схеманы аныктаган.
Бишкек мэриясынын Свердлов райондук билим берүү башкармалыгына текшерүү жүргүзүүдө Эсептөө палатасынын мамлекеттик инспектору Ж.К.Н., актыда одоно финансылык мыйзам бузууларды көрсөтүү шылтоосу менен, ошондой эле 28 билим берүү мекемесинин (27 мектеп жана 1 балдар чыгармачылык борбору) 2022-жылга карата финансылык-чарбалык ишмердүүлүгүнө кезектеги аудит жүргүзүү аркылуу, опузалап 5400 доллар алган. Өз кезегинде башкармалыктын жетекчилиги инспектордун талаптарын аткаруу максатында окуучулардын санына жараша билим берүү мекемелеринен 18 миң сомдон 27 миң сомго чейин акча каражатын чогултушкан.
Инспектор өзүнүн мыйзамсыз аракеттери аркылуу билим берүү мекемелеринин жетекчилерин ар кандай жолдор, шылтоолор менен ата-энелерден акча чогултуу сыяктуу мыйзамсыз аракеттерди жасоого мажбурлаган. Сотко чейинки өндүрүш ишинин алкагында Кылмыш-жаза кодексинин 342-беренесинин 2-бөлүгүнүн 5-пунктунда каралган кылмышты жасоого шектүү катары Эсептөө палатасынын инспектору Ж.К.Н. Кылмыш-процессуалдык кодексинин 96-беренесине ылайык кармалып, Бишкек ШИИБнин убактылуу кармоочу жайына киргизилди.
