Бишкек шаарынын Ленин райондук ички иштер башкармалыгына жаран К.Т. жазуу түрүндө арыз менен кайрылып, белгисиз эркек адамга карата чара көрүүнү суранган. Арызда көрсөтүлгөндөй, 2025-жылдын 2-декабрында болжол менен саат 14:00дөн 15:00гө чейин белгисиз адам алдамчылык жол менен ишенимге кирип, WhatsApp тиркемеси аркылуу +4915213728804 телефон номери менен байланышып, өзүн кант сатуучу катары тааныштырган.
Телефон сүйлөшүүсүнүн жүрүшүндө шектүү жаран көрсөтүлгөн дарекке кант жеткирип берүүнү убада кылып, товар үчүн төлөм катары жаран К.Т.ны «М-Банк» электрондук капчыгына 551 000 (беш жүз элүү бир миң) сом акча которууга көндүргөн. Акча каражатын алгандан кийин белгисиз адам телефонун өчүрүп, байланыштан чыгып, алган милдеттенмелерин аткарбай жашырынып кеткен. Бул факты боюнча Бишкек шаарынын Ленин райондук ИИБнин Тергөө кызматы тарабынан Кылмыш-жаза кодексинин 209-беренеси (Алдамчылык) боюнча кылмыш иши козголгон.
Жүргүзүлгөн тергөө жана ыкчам-издөө иш-чараларынын жүрүшүндө милиция кызматкерлери тарабынан 2002-жылы туулган Ж.Б. аттуу шектүү кармалган. Ал Тергөө кызматына жеткирилип, Кылмыш-процессуалдык кодексинин 96-беренесине ылайык Бишкек шаарынын ИИБнин убактылуу кармоочу жайына (ИВС) камакка алынган.
Урматтуу жарандар, эгерде сиздер бул шектүүнүн кылмыштуу аракеттеринен жабыркаган болсоңуздар, төмөнкү телефон номерлерине кайрылууңуздарды суранабыз: 0 779 043 407 же 102. Тергөө иштери улантылууда.
