20-декабрда саат болжол менен 03:20да «102» кызматына «Асанбай борборунун» аймагында жайгашкан түнкү эс алуучу жайлардын биринин жанында массалык мушташ болуп жатканы тууралуу билдирүү келип түшкөн. Бул факты Бишкек шаарынын Октябрь районунун ИИБнын маалыматтарды каттоо журналына катталып, алгачкы текшерүү иши башталган.

Окуя болгон жерге дароо Бишкек шаарынын ИИББнын патрулдук-посттук кызмат полкунун кызматкерлери барышкан. Барган учурда маалымат тастыкталган. Мыйзамсыз аракеттерди токтотуу жана окуянын бардык жагдайларын аныктоо максатында окуяга тиешеси бар бардык жарандар Бишкек шаарынын Октябрь районунун ИИБнын №3 шаардык милиция бөлүмүнө жеткирилген.

Жеткирилгендердин арасында төмөнкү жарандар бар:

Р.А. – 2003-жылы туулган;

А.Ф. – 2000-жылы туулган;

З.Д. – 2001-жылы туулган;

Ф.Э. – 2007-жылы туулган;

У.Д. – 2006-жылы туулган.

Учурда Бишкек шаарынын Октябрь райондук сотунун чечими менен аталган жарандар Бишкек шаарынын ИИББнын Коомдук коопсуздук кызматынын атайын кабыл алуу жайына 3 күндүк мөөнөткө камалды.

«Урматтуу шаар тургундары жана борбор калаанын коноктору. Бишкек шаарынын ИИББгы шаар тургундарын жана конокторун Жаңы жыл алдындагы иш-чаралар маалында коомдук тартипти бузбоого чакырат. Ар кандай мушташтар, агрессивдүү жүрүм-турум жана милиция кызматкерлеринин мыйзамдуу талаптарын этибарга албоо катуу жана токтоосуз түрдө токтотулат. Мыйзамды бузган бардык жарандар Кыргыз Республикасынын мыйзамдарына ылайык катуу жоопкерчиликке тартылат», — деп жазылат милициянын маалыматында.