Чүй облусунун ички иштер органдарынын кызматкерлери тарабынан 11 жыл мурун болгон адам өлтүрүү фактысы аныкталып, шектүү жаран кармалды. Бул тууралуу Чүй ОИИБден билдиришти.
2014-жылдын 13-ноябрында Сокулук районунун Нижневосточная айылындагы даректердин биринде эки жарандардын ортосунда капчык жоголгонуна байланыштуу жаңжал чыгып, бирөөсү экинчисин капчыкты уурдадың деп айыптап, күнөөнү мойнуна алдыруу максатында дене жаракаттарын келтирип, кыйноого алган. Окуянын кесепетинен бирөө алган жаракаттарынан улам ал жерден каза болгон. Бул окуядан кийин анын туугандары анын зордук-зомбулук жолу менен өлгөнүн билишип, бирок кылмыш фактысын жашырып укук коргоо органдарына кайрылбастан сөөгүн жерге беришкен. Ошондой эле, анын өлүм тууралуу «жүрөк-кан тамыр жетишсиздиги» деп көрсөтүлгөн жасалма күбөлүк жасатышкан. Чүй облусунун Ички иштер башкармалыгынын кызматкерлери тарабынан жарандын өлүмү тууралуу күбөлүктү жасалмалоо фактысын иликтөө учурунда анын өлтүрүлгөндүгү аныкталган.
2025-жылдын 6-августунда анын сөөгүнө эксгумация жүргүзүлүп, соттук-медициналык экспертиза дайындалган. Экспертизанын жыйынтыгына ылайык бул окуя зордук-зомбулук жолу менен болгондугу тастыкталган. Бул факты боюнча Кылмыш-жаза кодексинин 122-беренесинин (адам өлтүрүү) негизинде кылмыш иши козголуп, шектүү кармалган.
Посмотреть эту публикацию в Instagram
