Алдамчылык аракеттерди жасоого шектелип, мурда бир нече соттолгон Чүй облусунун 40 жаштагы жашоочусу кармалды. Бул тууралуу ИИМден билдиришти.
Жогорудагы жаран өзүнүн мыйзамсыз аракеттери менен автоунаалардын ээлеринин жана ишкерлердин, анын ичинде имараттарды куруу менен алектенгендердин ишенимине алдоо жолу менен кирип, аларга олуттуу материалдык чыгым келтирген. Буга чейин Бишкек шаарынын Биринчи май РИИБге ишкерлер арыз менен кайрылышып, укукка каршы аракеттерди жасаган адамга карата тиешелүү чараларды көрүп берүүлөрүн суранышкан. 2020-жылдын күз айында жаран алдоо жолу менен келишим түзүп, курулуп жаткан үйлөрдүн биринен батирди алып, аны кийин үчүнчү жакка сатып жиберген. Жабырлануучуга 25 миң доллар суммасындагы материалдык чыгым келтирилген.
Аталган факты боюнча Биринчи май РИИБдин Тергөө кызматы Жазык кодексинин 204-беренеси (алдамчылык) боюнча сотко чейинки өндүрүш жүргүзүп жатат. Кызматкерлер тарабынан жүргүзүлгөн ыкчам-иликтөө иш-чараларынын жүрүшүндө “Дима” каймана аттуу Талас облусунун 1981-жылы туулган тургуну кармалган. ИИМдин Криминалдык милиция кызматынын маалыматы боюнча кармалган жаран уюшкан кылмыштуу топтун мүчөсү катары ИИМдин ыкчам каттоосунда турат. 2021-жылдын 13-май күнү Бишкек шаарынын Биринчи май районунун сотунун токтому менен кармалган жаранды камакка алуу түрүндөгү бөгөт чарасы тандалды. Андан сырткары, жогорудагы жаран башка укукка каршы аракеттерди жасоого шектелүүдө. Бишкек шаарынын Ленин жана Свердлов РИИБде алдамчылык фактылары боюнча иликтенип жаткан материалдар бар.
2020-жылдын жай айында автоунаанын ээсинин ишенимине кирип, Лексус RX 330 үлгүсүндөгү автоунаасын Лексус GX 470 үлгүсүндөгү автоунаага алмаштыруу боюнча пайдалуу келишимди сунуштаган жана автоунааны ээлеп алган соң изин жашырып кеткен. Жабырлануучуга миллион сомдон ашык материалдык чыгым кетирилген. Бул факты Жазык кодексинин 204-беренеси (алдамчылык) боюнча катталган. Андан сырткары, ушундай укукка каршы аракеттер боюнча башка фактыларга дагы тиешеси бар. Буга чейин жаран жогорудагы факты боюнча кармалган жана сот тарабынан эки айга үй камагына алуу боюнча бөгөт чарасы тандалган. Бирок ал изин жашырып, мурда көрсөтүлгөн дарегинде жашабай калгандыктан, бөгөт чарасын өзгөртүү боюнча маселелер көтөрүлгөн.
Андан сырткары, жогорудагы жаран 2021-жылы эки чет өлкөлүк ишкерди өзгөчө ири өлчөмдө алдап кеткен. ИИМдин маалыматы боюнча ал ишенимге кирип, ишкердин биринен баасы 120 миң доллар турган көп сандаган килемдерди (жүк ташуучу унаа толгон) ээлеп алып, изин жашырып качып кеткен. Экинчи ишкерди дагы алдап, андан баасы 40 миң долларга жакын суммадагы килемдерин ээлеп алган. Жогорудагы фактылар боюнча учурда сотко чейинки өндүрүш жүрүп жатат.
