Чүйдө массалык башаламандыктарды уюштурууга катыштыгы бар делген шектүү кармалды. Бул тууралуу Чүй ОИИБден билдиришти.
Милициянын маалыматына караганда, өлкө аймагында массалык башаламандык уюштуруу максатында мурдагы саясий ишмерлер, уюшкан кылмыштуу топтордун мүчөлөрү жана жарандык активисттерден турган топ Чүй облусунда жана ошондой эле өлкөнүн башка аймактарында массалык башаламандыктарды, нааразычылык акцияларын өткөрүүнү пландап, дардык көрүп жатышкан. Бул факты катталып, Кылмыш-жаза кодексинин 278-беренесинде (массалык башаламандык) каралган кылмыштын белгилери боюнча кылмыш иши козголгон.
Шектүү катары топтун активдүү мүчөсү 1981-жылы туулган Ш.Э.К. “Темиш” жана ошондой эле “Ойгон Кыргыз” каймана аттуу Жалал-Абад облусунун тургуну аныкталып, тергөө кызматына жеткирилген.
Буга чейин да жогорудагы кылмыш иши боюнча жүргүзүлгөн ыкчам-иликтөө иш-чараларынын жүрүшүндө 1978-жылы туулган С.Ф. аттуу Жалал-Абад облусунун тургуну, 1998-жылы туулган М.О. аттуу Ош облусунун тургуну кармалган. Алар жогорудагы кылмыштуу топтун мүчөлөрүнө акча каражаттарын легалдаштырууну, банктык операцияларды жүргүзгөнү, Тилекмат Куреновдун жана ошондой эле башка адамдардын ар кандай чагымчыл видео материалдарын монтаждап даярдап, ар кандай социалдык тармактарда фейк аккаунттар аркылуу жайылтышканы аныкталган. Мындан тышкары жогорудагы кылмыш иши боюнча 1975-жылы туулган Ысык-Көл облусунун тургуну да кармалган. Учурда тергөө иштери уланууда.
