УКМК жаңы курулган имараттын тургундарын алдап кеткен деген шек менен курулуш компаниясынын жетекчилерин кармады.
УКМК Бишкек шаарынын Чыгыш-5 кичи районунда жайгашкан «Санхаус плюс» турак жай комплексин куруучуга карата алдамчылык жана курулуш нормаларын бузуу фактылары боюнча кылмыш ишин козгоду.
24-сентябрда Фейсбукта комплекстин жашоочуларынын видео кайрылуусу жарыяланып, анда подрядчы өз милдеттенмелерин аткарбай, натыйжада имарат ишке берилбей жатканына нааразы болушкан. Курулуш башталганга чейин компания турак жай комплексин ири шаарда жашоого эң ыңгайлуу шарттарды, анын ичинде коопсуздук системаларын, тосулган аймакты, жеке жер астындагы унаа токтотуучу жайды жана башкаларды сунуштайт деп жарнамалаган. Тургундардын кайрылууларын текшерүү учурунда үйдүн курулушу мыйзам бузуу жана макулдашылган долбоордон четтөө менен жүргүзүлгөндүгү аныкталган. Чындыгында жашоочулар долбоорго киргизилген жер астындагы унаа токтотуучу жайларды алышкан эмес.
Ишкананын жетекчилиги кирешени көбөйтүү максатында жер астындагы унаа токтотуучу жайды долбоорлоо документтерин жана курулуш нормаларын бузуу менен, бекитилген пландан четтеп, коммерциялык жайга айландырганы аныкталган. Бул соода-сатык келишимдеринин шарттарын, комплекстин жашоочуларынын мыйзамдуу укуктарын бузуп, айланадагы жол абалын да начарлаткан.
Мындан улам курулуш ишканасынын директору жана көзөмөл жүргүзгөн долбоорлоо уюмунун жетекчиси кармалып, Бишкек ШИИБдин убактылуу кармоочу жайына камалды. Тергөөнүн жүрүшүндө жогоруда аталган адамдар долбоордун ишке ашпай жатканы боюнча өздөрүнүн аракеттери мыйзамсыз экенин моюнга алышып, жанаша жайгашкан аймакка тиешелүү унаа токтотуучу жайды талаптагыдай уюштурууну убада кылышкан.
