Депутаттыкка талапкер аялы менен жазышкан делген жаранга балта менен кол салууга шектелип кармалды. Бул тууралуу Бишкек ШИИББинин басма сөз кызматы билдирди.
Маалыматка ылайык, 6-ноябрда саат 17:34тө Улуттук госпиталдын микрохирургия бөлүмүнөн милицияга 34 жаштагы бейтап тууралуу маалымат түшкөн.
Анын сол колунун экинчи манжасы жаракат алып, ачык сынык болгон. Окуя болгон жерге Ленин райондук милициясынын тергөө-оперативдик тобу барып, жабырлануучу арыз жазган.
Жабырлануучунун айтымында, ошол күнү түшкү саат 13:30 чамасында Асаналиев көчөсүндөгү үйдө экөөнүн ортосунда пикир келишпестик чыккан. Үйдүн ээси арыздануучуну аялы менен жазышып жүрөт деп айыптап, сумкасынан балта чыгарып, экөөнү тең өлтүрөрүн айтып коркуткан.
Андан соң алгач бутуна, кийин сол колунун манжасына балта менен урган. Натыйжада манжа жарым-жартылай кесилип кеткен.
Бул факт КР Кылмыш-жаза кодексинин 131-беренеси («Ден соолукка орточо оордуктагы зыян келтирүү») боюнча каттоого алынды.
Шектүү катары 1982-жылы туулган Ш.К. — кармалып, убактылуу кармоочу жайга камалды.
Маалыматтарга караганда, ал №27 шайлоо округу боюнча Жогорку Кеңештин депутаттыгына талапкер катары катталган.
Ал 2025-жылдын октябрында №27 шайлоо округунан (Ысык-Көл, Түп жана Ак-Суу райондору) мөөнөтүнөн мурдагы шайлоого катышуу үчүн арыз берген.
