27-июнь күнү “Ага-ини” тез татым жайынан тамактанып, 35 адам ууланган. Аталган окуядан кийин Жалал-Абад район аралык оорулардын алдын алуу жана мамлекеттик санитардык-эпидемиологиялык көзөмөлдөө борбору тарабынан аталган тез татым жайы жабылып, 7 500 сом айып салынды. Аталган окуяга байланыштуу бүгүн, 30-июнда Жалал-Абад шаарынын мэриясында жыйын болуп, тиешелүү мекеме-ишканалардын адистерине шаардагы тамактануучу жайларды, бат бузулуучу эт, сүт азыктарын, жер-жемиштерди көзөмөлгө алып, тез арада рейддерди өткөрүү боюнча тапшырма берилди.
Буга чейин «Ага-ини» кафесинен 19 адам уулангандыгы кабарланган. Кийин уулангандардын саны 35 адам болуп, алардын 27си облустук оорукананын жугуштуу оорулар бөлүмүндө дарыланып жатат. Дарыгерлер бейтаптардын абалы туруктуу экенин билдиришти.
