Жалал-Абад облусунун Аксы районунда каза болгон 32 жаштагы келиндин жакындары акыйкаттык издеп, УКМК төрагасы Камчыбек Ташиевге кайрылышты.
СЕРЕП МЕДИА маалымат агенттиги маркум келиндин агасы менен байланышканыбызда, бир тууганынын өлүмүнүн себебин билгиси келип жатканын айтты.
«Карындашымдын 1 кыз, 2 уулу бар. Эң кичүүсү 10 айлык. 4-ноябрда ата-энеме анын больницада экенин айтышкан. Ал учурда мен өлкөдө эмес болчумун. Күйөө балабыз асынып алганын айтып жатат. Бирок биз тараптан асынып алганын эч ким көргөн эмес. Эмнеден каза болгонун билгибиз келет. 4-ноябрь күнү эртең мененки саат 7-8дерде каза болуптур. Ата-энебизге саат 9да айтыптыр. Ошол эле күнү кечки саат 4-5терде жерге берип жатат. Нес абалда барган ата-энем жана атамдын агасына ошол жерде доом жок деген кагазга кол койдуруп алышкан экен. Каза болгонго чейин 2 ай үйүбүздө болчу. «Мен ал менен жашабайм» деп жубайыма айткан экен. Аны биз уккан эмеспиз. Жалдырап жарашалы деп келгенде колуна тапшырганбыз. 1 жуманын ичинде эле ушундай окуя болуп жатат. Жууган адам денесинде так бар экенин айтты. Биз УКМК төрагасына кайрылып, ишти акыйкат карап берүүсүн суранабыз»,- деди агасы.
Жергиликтүү ЖМКлар каза болгон келиндин жолдошу милиция кызматкери экенин жазышты.
Бул боюнча Жалал-Абад ОИИБге кайрылганыбызда, факты катталганын. Ишти прокуратура карап жатканын айтышты.
«4-ноябрь күнү танкы 7:45 чамасында Аксы РИИБдин нөөмөт бөлүмүнө 1990-жылы туулган жаран кайрылган. Анда ошол эле күнү 1993-жылы туулган аялы өздөрү жашап жаткан үйүнүн короосундагы турникке асып алганын билдирген. Окуя болгон жерден маркумдун асынган жиби жана ага таандык резина бут кийими алынган. Ал эми окуя боюнча каза болгон келиндин ата-энеси жана жакын туугандары эч кимге арыз доосу жок экендигин билдиришип, соттук-медициналык экспертизадан өткөрүүдөн баш тартышып, текшерүү иштерин токтотууну суранышып атайын акты толтурулган. Бүгүнкү күндө Аксы райондук прокуратурасы тарабынан текшерүү иштери жүргүзүлүүдө«,- дешти.
Маркумдун сүрөтү агасынын уруксаты менен жарыяланды.
