УКМК тарабынан кыймылсыз мүлктү мыйзамсыз ээлеп алуу жана документтерди жасалмалоо фактылары боюнча козголгон кылмыш иштерин иликтөөнүн алкагында «Кара риэлторлор» кармалды. Бул тууралуу УКМКдан билдиришти.
Эки аял Ооганстандагы согуштук аракеттердин ардагери жана экинчи топтогу майыптыгы бар жарандын ишенимине кирип, жасалма документтерди жасоо аркылуу нотариалдык жактан күбөлөндүрүлгөн ишеним кат жазып, Жалал-Абад шаарындагы батирин үчүнчү жактарга кийин сатуу менен каттап алган. Анын үстүнө кылмыштын изин жашыруу максатында Б.Н.М. жөнөткөн Т.А.Р. психиатриялык ооруканага жаткырылган, ал жерде 5 жылдан ашык кармалып турган.
Мындан тышкары, дагы бир жаран каза болгондон кийин Б.Н.М. маркумдун кошунасы менен сүйлөшүп алып, ортодо түзүлгөн делген нике күбөлүгүн жасалмалаган, ошону менен маркумдун үйүнө менчик укугун мыйзамсыз жол – жоболоштурган, бул анын мыйзамдуу мураскорунун турак жайга болгон укугунан ажыраткан.
Аны менен катар, Б.Н.М. өзүнүн жакын шериги менен биргелешип коркутуп, Жалал-Абад шаарындагы Г.Г.С.нын батирин ээлеп алышкан. Буга чейин Г.Г.С. батирин тарбиячысына каттатып берген, бирок бул тууралуу билген Б.Н.М. жана Б.А.К. батирди кайтарып берем деп коркутуп, андан соң батир Б.А.К.га катталган. Аталган адамдар тарабынан кысым жана алдамчылык аракеттеринен кийин Г.Г.С. көп өтпөй каза болгон.
Дагы бир эпизоддо, К.А.Б., Б.Н.М. менен сүйлөшүп алып, Е.Р.М. аттуу эжекесинин ишенимин кыянаттык менен пайдалануу жолу менен, аны багып жатат деген шылтоо менен андан батирге менчик укугун алган. Андан соң, Б.Н.М.нын жардамы менен жасалма документтер даярдалган (жашаган жеринен маалымкат жана Е.Р.М.нын психикалык жактан жабыркагандыгы жөнүндө кошуналарынын жамааттык арызы), бул аны психиатриялык стационарга мажбурлап жайгаштырууга негиз болуп, батирди кайра тариздеп, сатышкан. Ал эми Е.Р.М. психиатриялык ооруканада узак убакыт бою кармалган, андан кийин К.А.Б. аны үйүнө алып кеткен, ал жерде ага физикалык жана психологиялык кысым көрсөткөн, бул анын өлүмүнө себеп болгон.
