Октябрь райондук соту элиталык интимдик кызмат көрсөткөн интернет-группалардын администраторун күнөөлүү деп тапты. Бул тууралуу СЕРЕП МЕДИА маалымат агенттигине аталган соттон билдиришти.
Райондук соттун басма сөз кызматы билдиргендей, ал Кылмыш-жаза кодексинин 160-беренесинин 1-бөлүгүндө (Сойкулукка жана бузукулукка үгүттөө) каралган кылмышты жасагандыгы үчүн күнөөлүү деп табылды. Ал 100 миң сом айыпка жыгылган. Анын баш коргоо чарасы эч жакка кетпөө тил катына алмаштырылган.
Аталган жаран УКМК тарабынан кармалган. Ал 18 жаштан 25 жашка чейинки жаш кыздардан, ошондой эле Instagram жана Tik Tok социалдык тармактарында абдан популярдуу болгон белгилүү адамдардан жана блогерлерден турган интернет-группалар тармагын уюштурган деп шектелген. Андагы эскорт кызматтарынын баасы 1000ден 10 миң долларга чейин бааланып турган. Ошондой эле, ал кыздардын Дубай аймагына жана коңшу республикаларга интимдик кызмат көрсөтүү үчүн баруусун уюштурган.
