УКМК төрагасы Камчыбек Ташиев 24-июнда Токмок шаарында Чүй облусунун райондук мамлекеттик администрация жетекчилеринин, шаар мэрлеринин жана жергиликтүү башкаруу органдарынын катышуусу менен жыйын өткөргөн.
Буга чейин социалдык тармактарда Токмок шаарынын тургундары өлкө бийлигине кайрылып, шаардагы жаңы сейил бактын курулуш иштери кечеңдеп, сапатсыз жүрүп жаткандыгын жана шаардык спорт мектебинде капиталдык оңдоо иштери бир жылдан ашык убакыттан бери бүтпөй жаткандыгын айтып, жергиликтүү бийлик органдарына нааразы болушкан. Мындан улам, төрага аталган сейил бактын абалы менен жеринен таанышып, чындыгында эле сапатсыз экендигин белгилеген.
Мамлекетке ири өлчөмдө зыян келтиргени үчүн Токмок шаарынын мэри, Муниципалдык менчик башкармалыгынын башчысы жана эс алуу багын курууга жооптуу «Ал-Кадыр-Сантехсервис» ЖЧКсынын аткаруучу директору УКМК төрагасынын буйругу менен жыйын учурунда камакка алынган. Кечээ, 25-июнда президенттин тескемеси менен ээлген кызматтынан бошотулган.
Бүгүн, 26-июнда соттон маалымат беришип, алардын бөгөт чарасы каралганын билдиришти. Андагы маалыматка караганда, кармалгандар 24-августка чейин камакта калтырылды.
