Кечээ, 19-октябрда Кадамжай районунун Көк-Талаа айылынын 61 жана 29 жаштагы тургундарын белгисиз жарандар атып, 59 жаштагы аялды уруп, денесине жараат келтирип, изин жашырып кетишкенин билдиришти.
- Жабырлануучулар эс алып жаткан учурда, алардын үйүнө белгисиз жарандар белгисиз куралдар менен кирип, 61 жаштагы кишини көкүрөк жана бетине атып, анын уулу 29 жаштагы жигитти башына атып, 59 жаштагы аялдын башына балта менен уруп, мал сарайын өрттөп, короодо токтоп турган Хонда-СРВ үлгүсүндөгү унаасын өрттөөгө аракет кылып окуя болгон жерден изин жашырышкан. Атылган октон жараат алган ата-бала окуя болгон жерде каза болгон. Ал эми денесинен жараат алган аял Кадамжай райондук ооруканасына жеткирилген.
СЕРЕП МЕДИА маалымат агенттиги Марказ айыл өкмөт башчысынын орун басары менен байланышканыбызда, үй-бүлө дыйканчылык менен алектенген жарандар болгонун айтышты. «Мен башка маалымат бере албайм», — деген ал.
Ал эми Турмуш басылмасына 59 жаштагы Максуда Шадиева ошол күндү айтып берди. «Жолдошум намазын окуду. Мен кечки тамак жасап жаткам. Жолдошум намазын окуп бүтүп жата турайын деди. Кичине көзүм илинип кеткен экен. Ошол учурда белгисиз жарандар кириптир, «тарс» деген үн угулду. Ким кылса да, Кудай карап турат. Менин башыма 3 жолу балта менен урушту. Буга чейин эч ким менен ызылдашкан эмеспиз», — деди ал.
