Бүгүн, 2-июнь күнү Каракол-Эңилчек унаа жолунун жабылышы боюнча Ак-Суу райондук мамлекеттик администрациясында кечиктирилгис штаб отуруму өткөрүлдү. Бул тууралуу Өзгөчө кырдаалдар министрлигинен билдиришти.
«28-30-майда жааган калың кардын кесепетинен Каракол-Эңилчек унаа жолуна болжолдуу 80 миң метр куб кар көчкү түшүп, Тоң, Ак-Суу жана Жети-Өгүз райондорунун алыскы жайлоолоруна жол жабылып калган. Аталган унаа жолу бир тараптуу ачылып, калың кардан кар көчкү улам түшүп жабылып калгандыктан бир топ көйгөй жаралган. Министрдин орун басары Эделбек Кулматов алыскы жайлоолордогу чабандарга керектүү азык-түлүк жана мал жандыктарга тоют жеткирүүгө техника тартыларын билдирди», — деп жазылат маалыматта.
