«Кара-Булак» Эко-резорт эс алуу жайынын ээси айыл чарба багытындагы жерлерге өз алдынча мыйзамсыз коммерциялык объекттерди куруу фактысы боюнча кармалды. Бул тууралуу УКМКдан билдиришти.
Жүргүзүлгөн ыкчам-тергөө иш-чараларынын жүрүшүндө УКМК тарабынан эс алуучу жайдын ээси Аламүдүн районунун Арашан айыл аймагында жалпы аянты 6,1 гектар болгон жайыт жерлерин өз билемдик менен ээлеп алгандыгы жана капиталдык курулуштарды, тагыраагы 15 конок үйү, банкеттик залдары бар мончолорду, ресторанды, 2 кабаттуу административдик имаратты, банкеттик залды, 3 кабаттуу курулуп бүтө элек имаратты, кабиналарды, беседкаларды жана башка чарбалык курулуштарды курдурганы аныкталган.
Жогоруда аталган объектилер архитектура жана экология органдарынан эч кандай долбоорлоо жана уруксат берүүчү документтерисиз курулган, ошондой эле жер участогун трансформациялоо жана кадастрлык органдарда каттоодон өткөрүү жок, бул Кыргыз Республикасынын жер жана шаар куруу мыйзамдарынын ченемдерин одоно бузуу болуп саналат.
1-сентябрда эс алуу жайынын ээси кармалып, УКМКнын убактылуу кармоочу жайына киргизилди.
