Кечээ, 6-август күнү Бишкек шаарынын Көк-Жар жаңы коңушунун 172-контурунда Ахунбаев жана Достоевский көчөлөрүнүн кесилишинде белгисиз топ адамдар жолду мыйзамсыз тосуп алышкан. Бул тууралуу милициядан кабарлашты.
Милиция Көк-Жар конушундагы мыйзамсыз курулуштарды бузуу учурунда беш жаранды кармады. Кармалгандар: 1999-жылы туулган Б.М., 1991-жылы туулган А.Б., 1989-жылы туулган К.Н., 1990-жылы туулган М.У. жана 1965-жылы туулган А.Ж.
Октябрь райондук ИИБдин тергөө кызматы Кылмыш-жаза кодексинин 279-беренеси (Жолдорду мыйзамсыз тосуу) боюнча кылмыш ишин козгоду. Кармалгандар Бишкек ШИИББнын убактылуу кармоочу жайына киргизилди. Ошондой эле коомдук тартипти бузгандыгы үчүн райондук башкармалыкка 17 жаран жеткирилип, аларга карата Укук бузуулар жөнүндө кодекстин 128-беренеси (Ички иштер органдарынын кызматкеринин мыйзамдуу талабына баш ийбөө) боюнча протокол түзүлдү.
Кылмыш-жаза кодексинин 279-беренесине (Жолдорду мыйзамсыз тосуу) ылайык, жолду, катташуу жолдорун мыйзамсыз тосууну уюштурган же жетектеген, башкача айтканда, жолдо адамдардын топтолушун түзүү же тосмо курулмаларды, техниканы же башка буюмдарды орнотуу аркылуу адамдардын, автоунаалардын же башка транспорт каражаттарынын кыймылын бөгөттөө жана чектөө, олуттуу зыян келтирген болсо, айыпталуучу 1 жылдан 5 жылга чейинки мөөнөткө эркиндигинен ажыратылышы мүмкүн.
5-августта Бишкек шаарынын Көк-Жар айылынын №172 контурунда өзүм билемдик менен курулган 10дон ашык коммерциялык объект жана тосмо бузулган.
