Өзгөн районунда 16 жаштагы жарандын өлүмү боюнча тергөө иштери жүрүп жатат. Бул тууралуу СЕРЕП МЕДИА маалымат агенттигине Ош ОИИБден билдиришти.
Маалыматка караганда, 20-декабрь күнү саат 21:30 чамасында Өзгөн РИИБдин нөөмөт бөлүмүнө кабар келип түшкөн. Анда Өзгөн районунун Кызыл-Октябрь айыл аймагындагы № 62 кесиптик лицейдин окуучусу 2006-жылы туулган жарандын каза болгондугун Куршаб аймактык ооруканасынан билдиришкен.
Аталган маалымат Өзгөн РИИБдин кылмыштардын бирдиктүү реестрине катталып, ыкчам-тергөө тобу окуя болгон жерге чыгышкан. Ыкчам тергөө тобу барган учурда төмөнкүлөр аныкталган: 20-декабрь күнү саат 20:30 чамасында Өзгөн районунун Кызыл-Октябрь айыл аймагында №62-кесиптик лицейдин студенттери пикир келишпестиктен улам уруша кетишкен. Күбөлөрдүн берген көрсөтмөсүндө, 3-курстун студенти Өзгөн районунун тургуну 17 жаштагы өспүрүм Өзгөн районуну тургуну 16 жаштагы өспүрүмдү муштуму менен көкүрөк жагына уруп жибергенде эс-учун жоготуп, окуя болгон жерде каза болгондугу белгилүү болгон.
Маркумдун денесине сырттан кароо жүргүзүлүп, анын өлүмүнүн себебин аныктоо максатында соттук-медициналык экспертиза дайындалган. Бул кылмышка шектүү убактылуу кармоочу жайына киргизилди. Учурда териштирүү иш-чаралары жүрүп жатат.
