«Көз микрохирургиясы» госпиталынын директору Алмазбек Исманкулов кечээ, 3-ноябрда коррупцияга шектелип кармалды.
Аны менен бирге Ж.Баласагын атындагы Кыргыз улуттук университетинин, Саламаттык сактоо министрлигинин жана Билим берүү министрлигинин бир катар кызмат адамдарына карата кылмыш иши иликтенип баштады. Бул тууралуу ИИМден билдиришти.
Маалыматка ылайык, Исманкулов медициналык жабдууларды мыйзамсыз ээлеп алууга айыпталып жатат. Аталган жабдуулар насыянын негизинде Кыргызстанга алынып келинген.
ИИМден билдиришкендей, 1997-жылы Кыргыз улуттук универститетинде медициналык билимди өнүктүрүү максатында «InterHospital Medical Center» ЖЧКсы түзүлүп, директор болуп Алмазбек Исманкулов дайындалган. 1998-жылы Кореянын «Мэдисон Ко Лтд» компаниясы менен Кыргыз мамлекеттик медицина университетинин проректору Исманкуловдун ортосунда келишим түзүлүп, Кыргызстанга медициналык жабдууларды алып келүү боюнча макулдашууга кол коюлат.
Ошентип 1999-2000-жылдар аралыгында өлкөгө 9 миллион доллардан ашык суммага медициналык жабдуулар кирген. Бирок Исманкулов ойлоп тапкан схеманын негизинде КУМУнун, Саламаттыкты сактоо министрлигинин, Билим берүү министрлигинин жана башка мекемелердин айрым жетекчилеринин жардамы менен жабдыктар мыйзамсыз таратылып, Исманкуловго таандык жеке менчик медициналык клиникаларга өткөрүлүп берилген.
Мындан тышкары, бул жабдууларды сатып алуу үчүн алынган насыя төлөнбөгөн бойдон калып, соттун чечими менен аны мамлекет төлөөгө милдеттендирилген. Укук коргоо органдарынын маалыматына ылайык, аталган насыя бүгүнкү күнгө карата 31 миллион долларды түзөт.
Учурда бул окуяга тиешеси барларды аныктоо боюнча иликтөө иштери жүрүп жатат.
