Буга чейин Аэропорт — Бишкек жолунда жол кырсык катталганын, окуучулар бара жаткан автобусту GoBus маршруткасы сүзгөнү маалым болгон. Окуя боюнча Саламаттыкты сактоо министрлиги маалымат таратып, жабыркагандардын саны 16 адам экенин билдиришкен. Саат 15:00гө карата жол кырсыгынын кесепетинен жабыркап, саламаттыкты сактоо уюмуна жаткырылгандардын жалпы саны 21 адамды түздү (20 бала жана 1 чоң адам).
Шаардык балдар клиникалык ооруканасында ар кандай жаракат алган 20 бала жатат, алардын төртөө жандандыруу бөлүмүндө, үч баланын абалы туруктуу оор деп бааланса, бир баланын абалы өтө оор. Ооруканага жаткырылган калган балдардын абалы туруктуу, алган жаракаттарынын оордугуна туура келет, дарыгерлердин көзөмөлүндө болуп, бардык керектүү медициналык жардамдарды алууда. Кырсыктан жабыркаган бир адам «Тез жардам» ооруканасынын жандандыруу бөлүмүнө жаткырылды. Абалы оор деп бааланууда (баш мээнин жаракаты, жамбаш сөөктөрүнүн сынышы). Керектүү дары-дармектер жана медициналык буюмдар жетиштүү.
Сокулук районунун тез жардам кызматына кырсык тууралуу билдирүү саат 11:15тер чамасында түшүп, чакырууга эки бригада жөнөтүлгөн. Адегенде алар тез жардам кызматы жана жеңил автоунаалар менен №1 шаардык клиникалык ооруканага жеткирилип, андан соң Бишкек шаарындагы Медициналык жардам борборунун бригадалары аркылуу балдар шаардык балдардын тез жардам ооруканасына жеткирилген.
