Бишкекте жүк жүктөп жаткан адамды артынан келген унаа сүзүп, эки унаанын ортосунда калган адам окуя болгон жерде каза болгон. Сүзгөн жаран мас абалында болгон. Ал окуя болгон жерден качып кетип, колун кесип, эсин жоготкон абалда парктан табылган. Бул тууралуу Бишкек ШИИБдин басма сөз кызматы билдирди.
«Окуя 8-февраль түнкү саат 22:20 чамасында болгон. «Хундай-Соната» үлгүсүндөгү автоунаасы менен айдап бара жаткан 1995-жылы туулган П.А. жолдун четине токтоп турган, 1989-жылы туулган Э.Н. таандык “Хундай-Портер” үлгүсүндөгү автоунаага жүк жүктөп жаткан жеринен артынан сүзүп, жол кырсыгына кабылышкан. Натыйжада, “Хундай-Портер” үлгүсүндөгү автоунаага жүк жүктөп жаткан 1975-жылы туулган К.Т. эки автоунаанын ортосунда калып, окуя болгон жерден каза болгон. Ал эми, “Хундай-Портер” үлгүсүндөгү автоунаанын айдоочусу 1989-жылы туулган Э.Н. денесинен жараат алып, Бишкектеги ооруканага жаткырылган», — деп жазылат маалыматта.
Окуя болгон жерден качып кеткен П.А. кол тамырларын бычак менен кесип, эс алуу паркында эсин жоготуп коюп жаткан жеринен табылган. Ал бейтапканага жеткирилген, бирок жарааты кичине болгондуктан ооруканага жаткырылган эмес. Мындан тышкары, ал мас абалында болгон.
Аталган факты боюнча кылмыш иши козголуп, Бишкек ШИИББнын убактылуу кармоочу жайына киргизилген. Тергөө иштери улантылууда
