Массалык башаламандык уюштурууга шектелген 11 жаран кармалды. Арасында экс-депутат бар. Бул тууралуу ИИМден билдиришти.
ИИМ билдиргендей, 2024-жылдын 20-декабрында “Кырк уруу жети дубан ынтымагы” коомдук бирикмесинин айрым мүчөлөрү нааразы болгон жарандарга массалык башаламандыкты даярдоого жана чакырууга багытталган жолугушуларды байма-бай уюштуруп келген. Алардын өлкөдөгү кырдаалды туруксуздаштырууга жана мүлктөрдү талкалоону көздөгөн акция, митингдерин уюштуруп жаткандыгы тууралуу ыкчам маалымат келип түшкөн. Бул факты боюнча зомбулук көрсөтүү менен коштолуучу массалык баш аламандыктарды уюштуруу беренесинин негизинде кылмыш иши козголгон.
«Бүгүн, 24-февралда ИИМдин Тергөө кызматы тарабынан “Кырк уруу жети дубан ынтымагы” коомдук бирикмесинин айрым мүчөлөрүнүн жашаган даректерине тинтүү иштери жүргүзүлгөн. Тинтүү иш-чараларынын жүрүшүндө далил катары: граната, чолок мылтыктар, тапанча жана ок-дарылары, камуфляж кийимдери, атайын бет каптар, баңгизаттар, диний адабияттар, массалык башаламандыкты уюштуруу боюнча нускамалар, атылбоочу курал-жарактар, унаа номерлери, уюлдук телефондор, флэш карталар жана башка буюмдары табылган», — деп жазылат маалыматта.
Шектүүлөр убактылуу кармоочу жайына киргизилди. Тергөө иштери улантылууда.
