Москва райондук агрардык өнүктүрүү башкармалыгынын башчысы пара алып жаткан жеринен кармалды. Бул тууралуу УКМКдан билдиришти.
«Ал айыл чарба жерлерин кайра бөлүштүрүү мамлекеттик фондунун жерлерин берүү боюнча мекемелер аралык комиссиянын төрагасы болуу менен комиссиянын айрым мүчөлөрү жана үрөнчүлүк, асыл тукум чарбаларынын өкүлдөрү менен биргеликте акча каражаттарын жана башка материалдык жыргалчылыктарды мыйзамсыз алуу боюнча туруктуу коррупциялык схеманы жөнгө салгандыгы аныкталган. Акча каражаттарын алгандан кийин, айрым чарбалардын таламдарын алардын документтери мыйзамдарга ылайык келбегенине карабастан ыңгайлаштырып алган», — деп жазылат маалыматта.
Шектүү УКМКнын убактылуу кармоочу жайына киргизилди.
