Коррупцияга жана мыйзамсыз баюуга шектүү катары кармалган мурдагы премьер-министр Мухаммедкалый Абылгазиевден Бишкектеги 100 батирге байланыштуу айып алынды. Бул тууралуу жактоочу Данияр Эркимбаев 28-январда сот Абылгазиевдин бөгөт чарасын карагандан кийин журналисттерге билдирди.
«26-январдагы биринчи суракта Бишкектеги «Залкар курулуш» ишканасынын 100 батири Асылбек Абылгазиевге таандык деген айыпка (мурдагы премьердин тууганы) байланыштуу суроо берилди. Ал суракта баарын түшүндүрүп бергенден кийин бир күн ичинде кошумча текшерүү жүрүп, анын натыйжасында батирлер боюнча коюлган айып алынды. Бул фактылар Абылгазиевди мыйзамсыз баюу боюнча айыптоого жетиштүү далил жок экенин көрсөттү», — деди Эркимбаев.
Эркимбаев мурдагы премьердин бөгөт чарасы боюнча сот чечимине каршы жогорку инстанцияга даттана турганын кошумчалады.
Бишкектин Биринчи Май райондук сотунун 28-январдагы чечими менен Абылгазиев 26-мартка чейин Улуттук коопсуздук боюнча мамлекеттик комитеттин тергөө абагына камалган.
УКМК аны өкмөт башчы болуп турганда «Кумтөр Голд» ишканасына геологиялык чалгындоо жана алтын казуу иштерин жүргүзүүгө кошумча жер бөлүп берүүчү токтомго мыйзам бузуп кол койгон деген шек менен 26-январда кармаган.
Абылгазиевдин мыйзамсыз баюу беренесинин негизинде айыпталып жатканы жарыялаган.
Мухаммедкалый Абылгазиев 2018-жылы 20-апрелде өкмөткө келип, 2020-жылдын июнь айында жыштык чырына байланыштуу кызматтан кеткен болчу.
