Мурдагы депутат Султанбай Айжигитов менен жубайы кызматтык абалынан кыянаттык менен пайдаланган деп айыпталууда. Бул тууралуу УКМКдан билдиришти.
Буга чейин Султанбай Айжигитов Жогорку Кеңештин депутатынын мандатынан ажыратылган.
«3-апрелде экс-депутаттын жубайынын мыйзамсыз жумушка орношуусу боюнча кызматтык иликтөөнүн материалдары түшкөн. Бул факты боюнча кылмыш иши козголуп, тергөөнүн алкагында Айжигитов 2021-жылы Жогорку Кеңештин депутаттыгына шайлангандан кийин кызматтык турак жай жана башка жеңилдиктерди жеке кызыкчылыгы үчүн пайдаланып, 2022-жылдын башында жубайын Жогорку Кеңештин аппаратына мыйзамсыз жумушка орноштурууну уюштурганы аныкталган.
Ал эми колдонуудагы мыйзамдар жубайлардын түз баш ийишине же көзөмөлдөөдө болушуна байланышкан мамлекеттик кызматта болуусуна тыюу салат, ал эми парламент депутатынын Этика кодекси өзүнүн жакын туугандарынын кызыкчылыктарын жана Жогорку Кеңештин аппаратындагы кызмат орундарына ишке орноштуруу маселелерин илгерилетүүгө мүмкүндүк бербейт. Андан тышкары, Айжигитовдун жооптуу кызматы жана өлкөнүн жогорку мыйзам чыгаруу органынын депутаты катары жогорку абалы анын жубайынын кызматтык милдеттерин атайылап аткарбай, жумушка келбей калышына жол берген, ошол эле учурда ал өлкөнүн бюджетинен айлык акы жана башка тиешелүү төлөмдөрдү толук алып турган. Жолдошова 2022-жылдын февраль айынан 2025-жылдын апрелине чейинки аралыкта эмгек акы, сыйлыктар, эмгек өргүүсүнө жана башка төлөмдөргө республикалык бюджеттен 3,2 миллион сомдон ашык каражатты мыйзамсыз алган.
Айжигитов 2005-2008-жылдары жана 2010-2011-жылдары Баткен облусунун губернатору болуп турганда мамлекеттик кызматка ушундай мамиледе болгон. Эки жолу тең Айжигитов аялын мыйзамсыз ишке орноштурган, тагыраагы Жолдошова Баткен облусунун мамлекеттик администрациясына караштуу «Төрт-Гүл» мейманканасынын директору болуп, күйөөсүнө түз баш ийип, мыйзамсыз түрдө эмгек акы жана башка төлөмдөрдү алып жүргөн.
Тергөөнүн жыйынтыгында 30-апрелде Айжигитов жана Жолдошова кызмат абалынан кыянаттык менен пайдалангандыгы үчүн кылмыш-жаза жоопкерчилигине тартылып, аларга тиешелүү айып тагылып, Биринчи Май райондук соту тарабынан тергөөнүн жүрүшүндө баш коргоо чарасы тандалат», — деп айтылат маалыматта.
