«Женго» каймана аттуу Кадыр Досоновдун буюртмасы боюнча жасалган 10 жыл мурдагы киши өлтүрүүнүн бети ачылды. Бул тууралуу УКМКдан билдиришти.
«2025-жылы УКМК тарабынан 2015-жылдын 7-августунда Ош шаарынын тергөө абагында Ош облусунун Кара-Суу районунун 1980-жылы туулган тургунун өлтүрүү фактысы боюнча кылмыш иши козголгон.
Жүргүзүлгөн иликтөө жана ыкчам-издөө иш-чараларынын негизинде, бул киши өлтүрүүгө «Женго» каймана аты менен белгилүү болгон Кадыр Досонов буйрутма бергендиги, ошондой эле өлтүрүлгөн Кара-Суу районунун тургуну Камчы Көлбаевдин уюшкан кылмыштуу тобунун курамында болгондугу аныкталган. Тергөөнүн жүрүшүндө Досонов менен маркумдун ортосунда жеке кастык мамилелер болгондугу, буга Досоновдун «общак» деп аталган кылмыштуу шериктештиктин жалпы каражаттарынан акча өздөштүрүп алгандыгы тууралуу, маркумдун маалыматы бар экендиги себеп болгондугу такталган.
2015-жылдын 7-августунда соттолгон Жалал-Абад облусунун тургундары 1986-жылы туулган А.Р.Ш., 1986-жылы туулган Ю.Б.Н. жана Ош облусунун тургуну 1986-жылы туулган Д.А.Д. Досоновдун буйругу менен маркумга күч колдонуп, анын тамырына өлүмгө алып келүүчү көлөмдө «героин» баңгизатын сайып, кесепетинен ал ошол жерден каза болгон.
Азыркы учурда тергөө тарабынан бул кылмышка пенитенциардык тутумдун кызмат адамдарынын катыштыгы да текшерилип жатат, анткени 2015-жылдан бери анын өлүм себеби иш жүзүндө бекитилип келген жана өлүмгө баңгизаттарды ашыкча колдонуу себеп болгон деп гана саналган. Баналдык уурулук фактыларын жашыруу максатында Досонов эч ойлонбостон жердешинин өлүмүнө буйрук берген. Андыктан бул кылмыштын мотивинин кынтыксыздыгына өзгөчө көңүл бурулат»,- деп айтылат маалыматта.
