«Не сахар» долбоору Ош шаарындагы «Манас-Ата» кафесине барганда тартуучу топту киргизбей, тоскоолдук жараткан видеосу тараган. Андан соң тартуучу топ милиция кызматкери менен аларды киргизбей жүргөн администратордун сүйлөшүп турган видеосун чыгарган. Аталган окуя боюнча Ош шаардык милициясы үн катты.
«Манас-Ата» кафесиндеги окуя боюнча, Ош ШИИБинин кызматкерлери тарабынан кафенин жетекчилигине, администраторуна түшүндүрүү иштери видео коомчулукка тараганда эле жүргүзүлгөн. Окуя маалыматтардын электрондук журналына катталды. Ар тараптуу текшерүүлөр болот. Ошол эле мезгилде бул окуяны шылтоо кылып, улуттар аралык араздашууну күчөткөн, жарандардын улутуна, жеке кадыр-баркына доо кетирген комментарийлерди жазуудан баш тартууга чакырат», — деп жазылат маалыматта.
Ал эми Ош шаарынын мэриясы “Манас-Ата” кафесинде болгон окуя боюнча тиешелүү кызматтарга, анын ичинде укук коргоо органдарына, санэпид кызматына тиешелүү тапшырмалар берилгенин жана мыйзам чегинде бардык тиешелүү чаралар көрүлөрүн билдирди.