Октябрь райондук ички иштер бөлүмүнүн милиция кызматкерлери Владимир Косаш аттуу жаранды сабап, кыйнашкан. Бул тууралуу анын жактоочусу бүгүн, 14-июнда маалымат жыйында билдирди.
Окуя 2019-жылдын 17-январында болгон. Ошол күнү Косаш үйдө олтуруп ичимдик ичкен, андан улам аны өлтүргүсү келип жатат деп галлюцинация болуп, милиция чакырган. «Чакырууга милиция кызматкерлери келген. Анын бири Косаштын кайненеси менен сүйлөшүп жатканда менин кардарым бөлмөдөн бычак көтөрүп чыккан. Кайненеси милиция кызматкеринен бычакты алууну суранган. Милиция кызматкери бычакты алууга аркет кылганда Косаш кокусунан аны бычак менен жарадар кылган», — деди жактоочу.
Жактоочунун айтымында, андан кийин окуя болгон жерге башка милиция кызматкерлери келип, Косашты кармашкан. «Косашты унаада ур-токмокко алышкан, андан кийин Октябрь милиция бөлүмүнө алып барып, ошол жерде сабашкан», — деди жактоочу.
Жабырлануучунун жубайы Светлана Косаш кармалгандан кийинки күнү күйөөсүн көргөндө, аны тааныбай калганын айтты. «Аны ушунчалык катуу сабашкан. Азыр анын ден соолугунда көйгөйлөр бар. Жолдошум адам өлтүрүүгө аракет кылгандыгы үчүн 8 жылга эркинен ажыратылды. Биз милиция кызматкерлеринин аракетине нааразычылыгыбызды билдиргендиктен, ага ушул берене боюнча кылмыш ишин козгошту», — дейт ал. Светлана Косаш окуядан бир жума өткөндөн кийин күйөөсү башкы прокурорго арыз жазганын билдирди. Иш УКМКга жөнөтүлгөн. «Натыйжада, милиция кызматкерлери жумуштан бошотулду. Бир милиция кызматкери азыркыга чейин жашырынып жүрөт, калгандары кылмыш жоопкерчилигине тартылган жок», — деп кошумчалады ал.
Жыйындын катышуучулары УКМКга жана Башкы прокуратурага кайрылып, бул фактыны териштирип, укук коргоо органдарынын кызматкерлерин жоопко тартуу өтүндү.
