Кара-Көл шаардык соту 31 жаштагы Замирбекти (бардык аты-жөндөр өзгөртүлдү) аялы 1997-жылы туулган Саламатты өз өмүрүнө кол салууга мажбурлаганы үчүн сегиз жылга эркинен ажыратты. Сот ошондой эле абысыны 42 жаштагы Наргизаны беш жылга шарттуу түрдө көзөмөлгө алуу өкүмүн чыгарган. Бул тууралуу «Справедливость» укук коргоо уюмунан билдиришти.
Маалыматка караганда, жабырлануучу тараптын укугун дал ушул уюм коргогон. Наргизанын жолдошу 2015-жылы каза болгон. Замирбек 2017-жылы Саламатка үйлөнүп, беш жашар кызы бар. Үй-бүлөнүн жакындарынын айтымында, Замирбек маркум агасынын жубайы Наргиза менен жакын мамиледе болгон. Экөө тууралуу баары билип, бир күнү Саламат да кабардар болуп калган. Мындан улам үй-бүлөдө дайыма чыр-чатактар болуп турган. Келини менен жолугушууну токтотууну талабынан кийин күйөөсү аялын ур-токмокко алган. Саламаттын денеси көп учурда көгөрүп жүргөн.
Саламат күйөөсүнө эле эмес, абысынына да таасир этүүгө аракет кылган. Бирок Наргиза аны да шылдыңдаган, тактап айтканда, Саламат турмушка чыкканда кыз эмес болгонун айткан. Саламат мындай кордуктарга чыдабай 2021-жылдын 2-ноябрында сарайда асынып алган.
Замирбек менен Наргиза аялдын өз жанын кыйышына себепкер болгон дегенге таптакыр макул эмес. Алар бул трагедияга алып келиши мүмкүн болгон ар кандай аргументтер менен чыгышкан. Анын үстүнө алар көңүлдөш экенин мойнуна алышкан эмес, бирок бардык күбөлөр ырастап, иштин материалдарында алардын WhatsApp аркылуу жазышкан каттары тиркелген.
Саламаттын өз жанын кыйганы тууралуу жазган катында көп нерсени түшүндүрүп, ал экөөнү тең өз өлүмүнө күнөөлүү деп атаган жана мындай кадамга баруусунун себептеринин катарына алар тарабынан дайыма кысым көрсөтүү жана кемсинтүүнү атаган. Кызын Замирбектен төрөбөгөнүн, Саламатка арачылык кыла турган эч кимиси жок экенин айткан. Кол жазма экспертизасы жазууну өзү жазганын тастыктаган.
Адегенде Замирбекке, андан кийин Наргизага козголгон кылмыш иши «Адилет» укук коргоо уюмунун прокуратура, тергөөчү жана адвокаттардын принципиалдуу позициясынын аркасында козголгон. 31-октябрда Кара-Көл райондук соту аларды айыптаган чечим чыгарган.
