Бишкекте маркум Элдос Турсунбековго сакал өстүрүү боюнча операция жасаган дарыгерлердин лицензиясы болгон эмес. Бул тууралуу Жогорку Кеңештин Социалдык саясат боюнча комитетинин жыйынында Саламаттыкты сактоо министрлигинин Медициналык жана фармацевтикалык кызматты лицензиялоо башкармалыгынын башчысы Аман Осмонов билдирди.
Анын айтымында, сакал алмаштыруу операциясын жасаган дарыгерлердин бири косметологиялык клиникадан кеңсени ижарага алган. «Дарыгер 2025-жылдын 1-мартынан бери иштеп келген. 2023-жылы рейддин жыйынтыгында клиника лицензиясы жок иштеп жатканы аныкталган. Андан соң айып пул салынып, материалдар укук коргоо органдарына өткөрүлүп берилген», — деди Осмонов.
Бишкекте жеке клиникада сакал эктирүү үчүн операция жасатып жаткан маалда 30 жаштагы хирург, флеболог Элдос Турсунбеков күтүүсүз каза болгон.
«Элдос менин досум болчу. Жакындарына көңүл айтам. Кесиптеш болчубуз. Анализдердин жыйынтыгы менен операция жасалган. Чач көчүрүү учурунда жүрөгү токтоп калды. Тез жардам чакырып, 10 мүнөттөн кийин Тез жардам келди. Бизди милиция алып кетип, туугандары менен байланыша албай калдык. Бул процедураны 2 дарыгер, медайымдар менен чогуу жасаганбыз»,- деген Элдос Турсунбековго операция жасаган дарыгер.
