Ошто өзүн УКМК кызматкери катары тааныштырып, жарандарды алдап жүргөн Жалал-Абад облусунун 33 жаштагы тургуну кармалды. Бул тууралуу Ош ОИИБден билдиришти.
Ош шаарынын ички иштер башкармалыгына арыз менен Ноокат районунун 39 жана 61 жаштагы тургундары арыз менен кайрылган. Алар арыздарында өзүн УКМКнын бөлүм башчысы катары тааныштырган жигит аларга мамлекеттик ипотека аркылуу Ош шаарындагы көп кабаттуу үйлөрдөн кезексиз жана ылдам, каалаган кабаттан үй алып берүуну убадалап, акча каражаттарын алдап алып, изин жашырып кеткендигин билдиришкен. Шектүү өз сөзүнө ынандыруу үчүн ал жабырлануучуларга Ош шаарынын Ленин көчөсүндөгү жаңы курулуп жаткан үйдү айткан.
Шектүү жабырлануучуларга үй убадалап, 39 жаштагыдан жарандан 785 миң 500 сом, 61 жаштагы жарандан 477 миң 200 сом акчаларды которуу жолу менен алган соң, из жашырган.
Шектүү катары Жалал-Абад облусунун 33 жаштагы тургуну кармалды. Ал эч качан УКМКда иштебегендигин, жалган айткандыгын билдирген. Ошондой эле шектүү мурда алдамчылык менен бир нече ирет соттолгон.
