Жогорку Кеңештин депутаты Медер Алиев социалдык тармактагы баракчасына жаш жигитке жолукканын, ал жигит Жогорку сот аялын жана аялынын ойношун 15 жылга түрмөгө кескенин айтканын жазды.
«Жаңы эле эски Жогорку Кеңештин имаратынан эшикке чыгып баратсам бир жаш жигит учурашып, маселе менен кайрылайын деди. Көздөрү алаңдайт, аба дем жетпегендей энтигип. Колунда кагаздарды кармап алган, Жогорку Соттон чыктым азыр дейт. Аялын жана аялынын ойношун 15 жылга сот түрмөгө кести дейт. Көрсө, бул бала аты- Эмил. Ош облусунун Кара-Суу районунун Отуз-Адыр айылынан болот экен. Өзү Орусияда иштеп жүргөндө аялы ойношу менен кайнатасына кармалып калып, аны көрүп калды күбө катары калтырбайлы элге айтат деп аялы ойношу менен өлтүрүшүптүр.
Канча балаңар бар эле ортодо десем, 3 бала дейт. Эми байкуш баланын ызалангагын айтпагыла. «Макул, аялым мени алдады, жок дегенде атамды өлтүрүшпөй эле койбойбу» дейт.
Сот өмүр бою берген жок деп катуу ачуусу келип көзү чачырайт. «Буларды жөн койбойм, эл аралык сотко кайрылам» дейт. «Эмне үчүн ушундай зөөкүрлөргө өлүм жазасын киргизбейсинер?» дейт. Аябай катуу суранды Жогорку Кеңештен маселесин көтөрүп берүүнү, бирок түшүндүргөнгө аракет кылдым, Жогорку Соттун чечими акыркы жана даттанууга жатпайт деп»,- деп жазды ал.
Окуя боюнча Жогорку Сотко кайрылганыбызда, «Жогорку соттун 11-июндагы токтому менен С. кызы Р. жана Н.А.С. тууралуу Ош облустук сотунун кылмыш-жаза иштер жана укук бузуулар жөнүндө иштери боюнча соттук коллегиясынын 2025-жылдын 10-мартындагы өкүмү күчүндө калтырылды», — дешти. Ошондой эле Ош облустук соту аларды 15 жылга кескенин тастыкташты.
- 1-сентябрь күнү 1997-жылы туулган келин арыз менен милицияга кайрылган. Анда 1-сентябрга караган түнү үйүндө өзү менен бирге жашаган 1960-жылы туулган кайнатасы менен пикир келишпестиктен улам, анын арт жагына учтуу нерсе менен бир нече жолу сайып, өлтүрүп алгандыгын билдирген. Чогултулган материалдын негизинде Кылмыш-жаза кодексинин 122-беренеси (адам өлтүрүү) боюнча кылмыш иши козголуп, ыкчам тергөө амалдары башталган. Маркумдун жансыз денесине соттук-медициналык, соттук-химиялык экспертизалар дайындалып, окуяга күбөлөр суракка алынып, тергөө аракеттери улана баштаган. Жүргүзүлгөн ыкчам-иликтөө иш-чаралардын натыйжасында, жаңы жагдайлар аныкталып, кылмышка шектүү катары Аксы районунун 1997-жылы туулган С.кызы Р. менен бирге Кара-Суу районунун 1997-жылы туулган Н.А. аттуу жарандары кармалып, убактылуу кармоочу жайга киргизилген.
