Ош облустук соттук-медициналык экспертиза борборунун кызматкери 100 миң сом пара алып жаткан жеринен кармалды. Бул тууралуу УКМКдан билдиришти.
Коррупцияны жоюу жана мамлекеттер аралык мамилелерди чыңдоо боюнча өлкө жетекчилиги тарабынан жүргүзүлүп жаткан иштерге карабастан, УКМК Ош облустук соттук-медициналык экспертиза борборунун кызматкери тарабынан, каза болгон уулунун сөөгүн берүү процессин тездеткендиги үчүн Түркия Республикасынын жаранынан 100 миң сом өлчөмүндө акча каражатын опузалап талап кылуу фактысын аныктады.
19-мартта Өзгөн районунун Баш-Дөбөн айыл аймагынын Көк-Таш тилкесинде 1995-жылы 14-ноябрда туулган Түркия Республикасынын жаранынын жансыз денеси табылган. Ыкчам-издөө иш-чараларынын жүрүшүндө Өзгөн РИИБ тарабынан кылмышка шектүү катары 1992-жылы 14-октябрда Өзбекстан Республикасында туулган жаран кармалып, убактылуу кармоочу жайга киргизилген. Ал эми дагы бир шектүү 1980-жылдын 15-сентябрында туулган Д.М. издөөгө алынган.
2025-жылдын 1-апрелинде Ош облустук соттук-медициналык экспертиза борборунун имаратында мурда белгиленген акча каражатын алгандан кийин шектүү кармалып, УКМКнын убактылуу кармоочу жайына камалды.
