Таласта пабликтин администратору жарандан «жылаңач сүрөтүндү жарыялайм» деп опузалап 5000 сом талап кылган. Кылмыш иши козголгондо аны жабуу үчүн милицияга 150 миң сом сунуштап, пара берип жаткан жеринен эки жаран кармалды. Бул тууралуу Талас ОИИБден билдиришти.
10-февралда милицияга Талас шаарынын тургуну арыз менен кайрылган. Анда 8-февралда “interes_talas” аттуу инстаграм баракчасынан жазып, жеке аброюна шек келтирүүчү сүрөттөрүн коомго чыгарам деп коркутуп, 5000 сом акча каражатын опузалап талап кылган. Эгерде белгиленген акча каражатын бербесе, видеосун баракчага чыгара тургандыгын айткан.
Аталган окуя боюнча кылмыш иши козголгон. Тергөөнүн жүрүшүндө, опузалап талап кылуу фактысын оң жакка чечип, кылмыш ишин жабуу максатында Талас шаарынын тургундары 1974-жылы туулган жана 2007-жылы туулган ОИИБдин кызматкерине 150 миң сом берип жаткан жеринен кармалган. Бул окуя боюнча дагы бир «пара берүү» беренеси менен кылмыш иши козголгон. Шектүүлөр убактылуу кармоочу жайга киргизилди.
Милиция “interes_talas” инстаграм баракчасынан жабыр тарткандар болсо 03422 5 31 42, 0703 12 33 04 номерлерине кайрылууну сурайт. Азыркы учурда тергөө амалдары уланууда.
