Бишкектин Биринчи Май райондук сотунда депутат Асылбек Жээнбеков менен экс-премьер Темир Сариевдин тарапташтары митинг өткөрүп жатышат. Чогулгандар алардын камактан чыгарылышын талап кылышууда. Ал эми бөгөт чарасынын мөөнөтүн узартуу үчүн Асылбек Жээнбеков менен Темир Сариев сотко жеткирилди.
Жээнбеков УКМК тарабынан 31-майда кармалып, анын «Кумтөр» боюнча коррупцияга шектелип жатканы маалымдалган. Ошол эле күнү Биринчи Май райондук соту баш коргоо чарасын карап, аны 2 айга камакка алган.
Сариев УКМК тарабынан 3-августта кармалган. Сариевдин экономика министри, ошол эле учурда тиешелүү мамлекеттик комиссиянын төрагасы болуп турган убакта, Кумтөр кенин иштетүүдөн келип чыккан экологиялык зыяндын суммасын бир нече миллиард сомго аз көрсөткөнү, анын натыйжасында мамлекетке чоң зыян келтирилгени маалымдалган.
