Кара-Суу районунун мурдагы акими Тилек Матраимовго сот өкүмү чыкты. Маалыматты СЕРЕП МЕДИА маалымат агенттигине Ош облустук сотунан тастыкташты.
«Кара-Суу райондук сотунун 2024-жылдын 11-июндагы өкүмүнүн негизинде Тилек Матраимов Жазык кодексинин 337-беренесинин 3-бөлүгү менен күнөөлүү деп табылып, 3 жылдык мөөнөткө мамлекеттик жана муниципалдык кызматтарды ээлөө укугунан ажыратуу менен 1 миллион сом айып салынган.
Ош облустук сотунун 2024-жылдын 6-августундагы өкүмүнүн негизинде Жазык кодексинин 337-беренесинин 3-бөлүгү менен айыпталуучуга карата Кылмыш-Жаза кодексинин 79-беренесинин 1-бөлүгүн (күнөөсүн мойнуна алуу жөнүндө келишим түзүлгөн учурда жазаны дайындоо) колдонуу менен мамлекеттин пайдасына 300 миң сом өндүрүлгөн.
Облустук соттун өкүмүнө нааразы тарап Кыргыз Республикасынын Жогорку сотуна кассациялык тартипте даттанууга укуктуу»,- деп айтылат маалыматта.
- 25-мартта УКМК тиешелүү атайын кызматтар менен биргеликте Азербайжандын аймагында Мамлекеттик бажы кызматынын төрагасынын мурдагы орун басары Райымбек Матраимовду эл аралык издөөдө кармап, Кыргыз Республикасынын аймагына алып келди. Ошондой эле аны менен бирге бир туугандары Тилек Матраимов, Руслан Матраимов, Исламбек Матраимов да алып келинген.
- Матраимов Тилек Исмаиловичге Кылмыш-жаза кодексинин 337-беренесинин 3-бөлүгүндө (Кызмат абалын кыянаттык менен пайдалануу, этиятсыздыктан оор залал келтирген жосун) каралган кылмыш иши тагылган. Кийин үй камагына чыккан.
