УКМКнын Чек ара кызматынын кезектеги өргүүдө жүргөн аскер кызматкери адам өлтүрүүгө шектелип кармалды. Бул тууралуу УКМКнын Чек ара кызматынан билдиришти.
Маалыматка караганда, 18-сентябрда Баткен облусунун Лейлек районуна караштуу Эски-Оочу айылынын четинде эркек адамдын сөөгү табылган. Лейлек районунун ички иштер бөлүмүнүн кызматкерлери тарабынан жүргүзүлгөн ыкчам-тергөө иш-чараларынын жүрүшүндө, 6-сентябрдан бери кезектеги өргүүдө жүргөн 1991-жылы туулган УКМКнын Чек ара кызматынын аскер кызматкери бул окуяга шектүү катары өтүүдө.
Алдын ала алынган маалыматтарга караганда, 17-сентябрь күнү аталган аскер кызматкери эки досу менен үлпөт тойдон кайтып келе жатышкан. Эки достун ортосунда чыккан ооз эки кайым-айтышуу мушташка айланып, жыйынтыгында бири каза болгон. 18-сентябрда аскер кызматкери укук коргоо органдарынын кызматкерлери тарабынан кармалган.
Учурда бул окуя боюнча тергөө иштери жүрүп жатат.