26-февралда Бишкек шаарынын Свердлов райондук милициясына жаран арыз менен кайрылган. Бул тууралуу Чүй ОИИБден билдиришти.
Арызында 26-февраль күнү болжол менен саат 16:00дө белгисиз 6-7 жаран өздөрүн Токмок шаардык администрациясынын өкүлү деп тааныштырып, Токмок шаарында жайгашкан «Салтанат Кейджи» ЖЧКсынын кеңсесине уруксатсыз кирип, агрессивдүү түрдө кызматкерлердин бирин сыртка чыгарып, зомбулук көрсөткөнүн, кеңсесин өрттөп кетерин айтып коркутуп, шаардан чыгып кетүүгө мажбур кылган. Аталган факты Свердлов райондук ички иштер башкармалыгында каттоого алынып, териштирүү үчүн Токмок шаардык милициясына жөнөтүлгөн. Териштирүүнүн жүрүшүндө «Салтанат Кейджи» ЖЧКсынын кеңсесине келген белгисиз жарандар Яндекс Go’дун Токмок шаарында иштөөсүнө каршы чыгышкан.
Кечээ, 9-март күнү Токмок шаарынын тургуну 1988-жылы туулган Ч.К. аттуу жаран шектүү катары кармалып, убактылуу кармоочу жайга киргизилди. Тинтүү учурунда газотравматикалык тапанчанын октору табылган. Учурда тергөө уланууда.
Өздүк булактардын маалыматына караганда, кармалган жаран Токмок шаардык кеңештин депутаты.
