Ушул жылдын 2-ноябрь күнү Жалал-Абад обулусунун Токтогул районунда 24 жаштагы Салтанат Советбек кызы аттуу келиндин жансыз денеси өзү жашаган үйүнүн короосундагы мал сарайдын ичинде жипке асылган абалда табылган. Келин өлүм алдында дептер барагына жазылган кат жөнөткөн. Ал катта ушул кадамга барышынын себеби жолдошу жана жеңеси экени, алардын кемсинтип келгенин айтып күнөөлөгөн.
SUPERTV телеканалы аталган окуя боюнча 19-ноябрь күнү маркумдун агасынын пикирин уккан. Ал өлүмгө келиндин жолдошун жана абысынын айыптаган эле. Видео жарык көргөн соң, дал ошол видеодо аты аталган маркумдун абысыны Назира Иметкулова биздин редакцияга байланышып, өз чындыгы бар экенин билдирди. Ал Салтанат Советбек кызынын өлүмүнө байланышкан өзүнө карата айыптоолорго макул эместигин айтты. “Келинибиздин өлүмүнө агасы мени күнөөлөп жатат. Мен кайнимди 6 жашынан тарта багып, чоңойтуп, кийин үйлөнгөндө да бар мүлкүмдү жумшап, жардам кылдым. 2017-жылы бизге келин болуп келген Салтанат мурда-кийин үйдөн качып жүрчү. Келиним менен кайнимдин жашоосуна таежелери көбүрөөк кийлигишчү. Келинибиз кайнимдин телефонун текшерип, күйөөсүн менден кызгана берчү. Салтанат кайним экөөбүздү төшөктө жаткан жерден кармап алган деген айыптоо чындыкка дал келбейт. Ак ийилет, бирок сынбайт. Өлүм алдында жазылган катта эмнеге менин атым аталганын түшүнгөн жокмун. Ошондой эле Салтанаттын агасы уулумду да курулай күнөөлөп жатат. 5 маал намаз окуган, жаңы эле үйлөнгөн балам кантип ошондой ишке барсын? Бул окуяга байланыштуу биздин үй-бүлө мүчөлөрүнө күнөө коюу – биздин намысыбызга тийди”, — дейт Иметкулова.
