УКМК тарабынан мыйзамсыз менчиктештирилген социалдык инфраструктуралык объекттерди кайтаруу боюнча жүргүзүлүп жаткан иштердин алкагында Бишкек шаарынын Чыгыш-5 кичи районундагы жалпы аянты 2800 чарчы метрлик жана жанаша аянты 1 гектардан ашык болгон бала бакчанын имаратын менчиктештирүүдөгү мыйзам бузуулар аныкталды. Бул тууралуу УКМКдан маалымдашты.
Бала бакча мурда Фрунзедеги СССРдин 50 жылдыгы аталышындагы Электрондук эсептөөчү машиналар заводунун балансында турганы аныкталган. Бирок жогоруда белгиленген балдар бакчасынын комплекси 1993-жылы Кыргыз Республикасынын колдонуудагы мыйзамдарын жана социалдык объекттерди ээликтен ажыратууга тыюу салган ченемдик-укуктук актыларды бузуу менен мыйзамсыз менчиктештирилип, «Ж» ААКтын дарегине жеке менчикке өткөрүлүп берилген жана 1999-жылы Б.К. аттуу жаранга сатылган, ал 2009-жылы белекке берүү келишими аркылуу өзүнүн жакын туугандарына кайра жол-жоболоштурган.
Көрүлгөн чаралардын натыйжасында балдар бакчасынын имаратынын менчик ээлери бул социалдык мүлккө ээлик кылуунун мыйзамсыздыгын түшүнүшүп, болжолдуу наркы 948 миллион сом болгон жанаша аймагы менен жогоруда белгиленген имаратты мамлекеттин балансына өз ыктыяры менен кайтарып беришти.
