Энергетика министрлигине караштуу «Кыргыз жылуулук энерго» мамлекеттик ишканасынын кызмат адамдары тарабынан мыйзам бузуу фактылары аныкталды. Бул тууралуу УКМКдан билдиришти.
«УКМК тарабынан Энергетика министрлигине караштуу «Кыргыз жылуулук энерго» мамлекеттик ишканасынын жылуулук менен жабдуу боюнча Канттагы филиалынын кызмат адамдары тарабынан мыйзам бузуу фактылары аныкталып, ири финансылык зыян келтирилгени аныкталды. Козголгон кылмыш ишинин жана дайындалган экспертизалардын алкагында тийиштүү текшерүүлөр жүргүзүлүп, жыйынтыгында бюджеттик каражаттарды көмүскө жүгүртүүгө боюнча туруктуу мыйзамсыз схемалардын бар экендиги тастыкталды», — деп айтылат маалыматта.
Маалыматка караганда, мазутту керектөөнүн тарифтерин жасалма жогорулатуу, жогорулатылган баада товарларды жана кызмат көрсөтүүлөрдү сатып алуу, ошондой эле башка укук бузууларга жол берилгендигинин натыйжасында мамлекетке 22,5 миллион сом суммасында зыян келтирген.
Азыркы учурда иштин бардык жагдайларын тактоого аныкталган коррупциялык схемаларга тиешеси бар кызмат адамдарын, ошондой эле бюджеттик каражаттарды мыйзамсыз чыгаруу каналдарын аныктоого багытталган тергөө иш-чаралары жүргүзүлүүдө.